Dövlətə qarşı qurulan xəyanət şəbəkəsinin ifşası davam edəcək

Son günlərdə əldə olunan faktlar və hüquqi proseslər bir daha göstərir ki, Azərbaycanda dövlətçilik və milli maraqlara qarşı gizli şəkildə formalaşdırılmış xəyanət şəbəkəsinin bütün qolları artıq hüquqi müstəvidə açılır və ifşa edilir. İstintaq materialları, əməliyyat tədbirləri və ortaya çıxan mənbələr zaman-zaman cəmiyyətdə səsləndirilən şübhələrin təsadüfi olmadığını sübut etdi.

AXCP adlanan qurumun rəhbəri Əli Kərimlinin Dövlət Təhlükəsizliyi Xidməti tərəfindən saxlanılması və barəsində həbs qətimkan tədbirinin seçilməsi, illərdir “müxalifətçilik” pərdəsi altında xarici dairələrə xidmət edən marginal siyasi dairələrin ifşasında yeni mərhələdir. Uzun müddətdir cəmiyyətin hiss etdiyi, lakin indi hüquqi təsdiqini alan həqiqət budur ki, Əli Kərimli siyasi fiqur deyil, xarici mərkəzlərin Azərbaycandakı icraçısı kimi fəaliyyət göstərib.

Son istintaq materialları da açıq şəkildə göstərdi ki, Əli Kərimli ilə Ramiz Mehdiyev arasında gizli əməkdaşlıq mövcud olub. Bu isə dövlətə qarşı paralel siyasi xəttin illərdir formalaşdırıldığını sübut edir.Bu qaranlıq şəbəkənin məqsədi aydın idi: Azərbaycanı xaosa sürükləmək, konstitusiya quruluşunu zorla dəyişdirmək və ölkəni xarici güclərin asılılığına salmaq.

Son günlər xəyanətkar qruplaşmanın qaçış planları müzakirə mövzusudur.
Hadisələrin gedişatı göstərir ki, Ramiz Mehdiyev işi çərçivəsində proseslər dərinləşdikcə, müxtəlif radikal qrupların iç üzləri daha aydın görünməyə başlayıb.
Gültəkin Hacıbəyli və Ramizn Mehdiyevin ətrafında toplaşmış şəxslər də bu prosesdən duyuq düşərək tələsik şəkildə ölkədən qaçmağa çalışıblar. Əli Kərimlinin sağ əli sayılan Fuad Qəhrəmanlı aylar öncə Fransaya üz tutub, Cəmil Həsənli isə planlaşdırdığı Dubay “səfərinə” yetişə bilməyib. Bu şəxslərin davranışları bir daha sübut edir ki, illərlə “demokratiya”, “insan haqları” pərdəsi arxasında gizlənən bu qruplaşmaların əsl məqsədi dövlətə xəyanət olub.

Hətta Rusiyadakı bəzi dairələrlə də Ramiz Mehdiyev vasitəsilə əlaqələr quraraq diaspor qurumlarını öz təsirləri altına almağa cəhd göstəriblər. Məqsəd Azərbaycana qarşı Kremlin sifarişi ilə fəaliyyət göstərən kölgə şəbəkəsi yaratmaq.
Lakin unudublar ki, Azərbaycan artıq 90-cı illərin zəif, parçalanmış dövləti deyil. Prezident İlham Əliyevin rəhbərliyi ilə bu gün ölkəmiz güclü, müasir və suveren siyasət yürüdən regional qüvvəyə çevrilib.

Demokratik sistemlərdə müxalifət zəruri institutdur. Lakin AXCP-Milli Şura tandeminin fəaliyyəti heç bir siyasi mübarizə standartına uyğun gəlməyib. Onların yeganə məqsədi Azərbaycan dövlətini zəiflətmək, cəmiyyətdə narazılıq yaratmaq və xarici mərkəzlərə informasiya ötürmək olub.

44 günlük Vətən müharibəsi zamanı xalq dövlətin və Ali Baş Komandanın ətrafında birləşmişdi. Lakin bu “müxalifət liderləri” həmin günlərdə də yenə Azərbaycanı hədəfə alan təşviqatla məşğul olur, Zəfərimizə kölgə salmağa çalışırdılar. Bu davranış təkcə siyasi xəta deyildi, milli xəyanət idi.

Bu gün həyata keçirilən hüquqi tədbirlər təsadüfi deyil. Dövlət təhlükəsizliyinə qarşı yönələn hər bir fəaliyyət, kim tərəfindən həyata keçirilməsindən asılı olmayaraq, hüquqi qiymətini alacaq.
Azərbaycan dövləti güclüdür, ayıqdır, çevikdir.
Bu səbəbdən radikal qruplaşmaların fəaliyyəti artıq hüquqi çərçivədə neytrallaşdırılır. Cəmiyyət isə bu addımları tam dəstəkləyir, çünki sabitlik və təhlükəsizlik hər bir vətəndaşın həyatına birbaşa təsir edən amildir.Azərbaycanın son illərdə iqtisadi inkişafı, siyasi sabitliyi, işğaldan azad edilmiş torpaqların bərpası, yeni regional tərəfdaşlıq formatlarında lider rolunu oynaması bəzi xarici dairələrin narahatlığına səbəb olub.

Xüsusilə Azərbaycanın müstəqil siyasət yürütməsi, heç bir qlobal bloka və ya təzyiq mərkəzinə tabe olmaması ölkəmizə qarşı informasiya sabotajlarının artmasına yol açıb.

Bu kampaniyaların yerli icraçıları isə məlumdur: AXCP, Milli Şura və onların ətrafında formalaşan radikal qruplaşmalar.

Bu gün Azərbaycan iqtisadi artım tempinə görə regionda lider mövqedədir. Enerji, nəqliyyat və geosiyasi layihələr ölkəmizin strateji çəkisini artırıb. Turizm, sənaye, kənd təsərrüfatı və müdafiə sənayesi sahələrində genişmiqyaslı inkişaf müşahidə olunur.

Bütün bunlar Prezident İlham Əliyevin uzaqgörən siyasətinin bəhrəsidir.
Azərbaycanın beynəlxalq arenada etibarlı tərəfdaş kimi qəbul edilməsi, ABŞ Prezidentinin ölkəmizə müsbət münasibəti də bu siyasətin uğurunu təsdiqləyir.Bu gün Azərbaycan heç vaxt olmadığı qədər güclüdür.
Dövlətin təhlükəsizlik strukturları hər hansı təhdidi dərhal aşkarlayıb zərərsizləşdirmək gücünə malikdir.

Azərbaycanın milli maraqlarına zidd istənilən fəaliyyət hüquqi qiymətini alacaq.
Xəyanətkar planlar ifşa ediləcək.
Milli sabitliyi pozmağa çalışan heç kim cəzasız qalmayacaq.

Ramiz Mehdiyevin qurduğu şəbəkənin, Əli Kərimli epizodunun və digər rabitələrin ifşası bu prosesin başlanğıcıdır. Dövlətin iradəsi dəyişməzdir: Azərbaycanın konstitusiya quruluşuna qarşı yönəlmiş bütün cəhdlər qətiyyətlə yox ediləcək.