“Mehdiyev–Kərimli şəbəkəsi tam şəkildə ifşa olunmalıdır” - Adəm İsmayıl Bakuvi
Vəhdət Partiyasının sədri Adəm İsmayıl Bakuvi Ramiz Mehdiyev və Əli Kərimlinin illərlə formalaşdırdığı iddia edilən gizli şəbəkə ilə bağlı sərt açıqlama verib.
Partiya sədri Yenicag.az-a açıqlamasında bunu “Azərbaycan dövlətinə qarşı qurulmuş sistemli xəyanət mexanizmi” adlandırıb və bu şəbəkənin bütün həlqələrinin tam ifşa olunmasının vacibliyini vurğulayıb.
Adəm İsmayıl Bakuvi bildirib ki, Mehdiyevin dövlət strukturlarında topladığı korrupsiya resursları və Əli Kərimlinin radikal şəbəkələri eyni məqsədə – hakimiyyəti qanunsuz yolla ələ keçirmək, konstitusiya quruluşunu sarsıtmaq və ölkədə xaos yaratmağa yönəlib:
“Ramiz Mehdiyev və Əli Kərimlinin illərlə qurduqları gizli əməkdaşlıq, dövlət strukturunda və radikal müxalifət daxilində yaratdıqları şəbəkə, cəmiyyətə yönəltdikləri psixoloji təzyiq, manipulyasiya və xaos planları artıq hüquqi şəkildə üzə çıxır. Bu proses təkcə bir cinayət işinin istintaqı deyil, bu, Azərbaycan dövlətinə qarşı qurulmuş sistemli xəyanət mexanizminin dağıdılmasıdır”.Vəhdət Partiyasının sədrinin fikrincə, sözügedən şəbəkənin fəaliyyəti Azərbaycanın milli təhlükəsizliyinə birbaşa təhdid xarakteri daşıyıb:
“Onların xarici xüsusi xidmətlərlə əlaqələri, gizli maliyyə kanalları, bağ evlərində keçirilən görüşləri, cəmiyyətə davamlı şəkildə ‘çevriliş olacaq’ mesajları ötürməkləri ölkənin milli təhlükəsizliyinə açıq təhdid idi”.
Adəm İsmayıl Bakuvi qeyd edib ki, bu şəbəkə illər boyu cəmiyyətin həssas təbəqələrini – tələbələri, işsizləri, sosial çətinlik yaşayan insanları – öz siyasi məqsədləri üçün alətə çevirib:
“Bu şəxslər illərlə xalqın ən həssas təbəqələrini – tələbələri, işsizləri, sosial çətinlik yaşayan insanları manipulyasiya edib, onları öz siyasi ambisiyalarının alətinə çeviriblər. Cəmiyyətə qorxu, gərginlik və təxribat toxumu səpiblər. Bu, artıq siyasi fəaliyyət deyil, bu, xalis xəyanətdir”.
Vəhdət Partiyasının sədri hesab edir ki, dövlətin bu istiqamətdə apardığı proseslər özünü təmizləmə mərhələsidir və heç kimə toxunulmazlıq imtiyazı tanınmamalıdır:Azərbaycan dövləti bu gün özünü təmizləyir. Şəbəkənin bir qolu Mehdiyevin iç çevrəsi, digər qolu Əli Kərimlinin radikal strukturları idi. Onlar birlikdə Azərbaycan dövlətçiliyinə zərbə vurmağa cəhd ediblər. Bu cəhdin qarşısı alınıb və alındıqca da alınacaq”.
O həmçinin vurğulayıb ki, istər keçmiş yüksək vəzifəli məmurlar, istərsə də radikal müxalifət təmsilçiləri qanun qarşısında bərabər olmalıdır:
“Hesab edirəm ki, bu şəbəkənin bütün həlqələri tam açılmalı, iştirak edən hər kəs – istər yüksək vəzifəli keçmiş məmur, istərsə də radikal müxalifət lideri qanun qarşısında cavab verməlidir. Azərbaycan dövləti heç kəsə imtiyaz tanımamalıdır”.
Adəm İsmayıl Bakuvi bu prosesin Azərbaycanın gələcəyi və dövlətçiliyin möhkəmlənməsi baxımından həlledici rol oynadığını deyib: “Bu proses Azərbaycanın gələcəyi üçün vacibdir. Dövlət daxilindəki qalıq strukturlar, köhnə şəbəkələr, illərlə toxunulmaz görünən qruplar tamamilə təmizlənməlidir. Azərbaycanın bu günkü gücü və sabitliyi belə təhlükələri kökündən məhv etməyi tələb edir. Azərbaycan dövləti güclüdür və bütün gizli şəbəkələri ifşa etməkdə qətiyyətlidir”.
Vəhdət Partiyasının sədri bir daha vurğulayıb ki, “xəyanətə qarşı güzəşt olmamalıdır və olmayacaq”.
