"Özəl məktəblər 1000 kasıb balasını oxutmaqla yaxşı nümunə ola bilərlər" - Deputat
Son dönəmlər ölkədə dövlət məktəblərin nüfuzu aşağı düşməyə başlayıb. Valideynlər övladlarının daha keyfiyyətli təhsil alması və dünyagörüşlü yetişməsi üçün alternativ yollar axtarırlar. İmkanı çatan valideyn özəl məktəblərə üz tutur.
Bəs görəsən həqiqətən də özəl məktəb daha keyfiyyətli təhsil verir? Dövlət məktəbləri nə üçün yaradılan şəraitə və imkanlara baxmayaraq özəl məktəblərlə rəqabətdə uduzur?
Mövzu ilə bağlı danışan Milli Məclisin Elm və təhsil komitəsinin üzvü Etibar Əliyev dedi ki, indi əhalinin müəyyən təbəqəsindən ibarət olan imkanlılar övladlarını aparıb özəl məktəbə qoyurlar:
"Orta təbəqə ilə kasıb təbəqə üçün o təhsil əlçatan deyil. Yəni təhsil haqları o qədər yüksəkdir ki, 7 mindən 20 minə qədər məbləğdir. Müəyyən qrup insanlar üçün bu, əlçatandır və övladlarının həmin məktəbdə təhsilini təmin edirlər. Ancaq buna baxmayaraq, dövlət məktəblərində şagird sayından asılı olmayaraq təhsilin keyfiyyətinə fikir vermək lazımdır ki, valideynlər, yəni kasıb təbəqə övladlarını dövlətin qanadı altında olan məktəblərdə yüksək təhsillər oxutsunlar. Digər tərəfdən özəl məktəblərin tam əksəriyyəti ingilis dilli təhsil verir. İngilis dilli təhsil verdiyinə görə valideynlər hesab edirlər ki, onların gələcəkdə karyeraları üçün, perspektiv üçün ingilis dili lazımdır və həmin məktəblərdə övladlarının təhsilini maliyyələşdirirlər. Ancaq bütün özəl məktəblər vətəni sevmək naminə, vətənpərvərlik naminə ən azından özlərinin 10 faiz kvotasını istedadlı kasıb uşaqlara verməlidirlər.
Bu çox böyük rəqəm etməz. Məsələn, 100 nəfər, 1000 nəfər istedadlı kasıb balasını oxutmaqla yaxşı nümunə ola bilərlər. Hazırda dünyada istedadlar axtarırlar. Amerika, İngiltərə, Fransa, Sinqapur istedadlı uşaq axtarır. Bütün hallarda bu gün özəl məktəblərdə də, müəyyən nizamsızlıq hökm sürür. Əsas da təhsil haqlarında əsas soruşulur ki, təhsil haqqı nə qədərdir? Təhsil haqqı çox olduqca, sanki hesab edirik ki, burada keyfiyyətli təhsilə görədir. Amma elə deyil. Mən Dövlət İmtahan Mərkəzinin statistik məlumatlarında özəl məktəblərin xüsusi nailiyyətlərini görmürəm. Elə orta məktəblərimiz var ki, nəticələri özəl məktəblərdən yüksəkdir. Bütün dünyada belədir ki, varlı təbəqə həmişə, çalışır ki, övladlarının qabiliyyəti olmasa belə ona yüksək təhsil versinlər. Kasıb təbəqə isə mütləq və mütləq dövlətə ümidli olur. Dövlətin bu sahə üzrə nazirliyi, bu sahə üzrə məmurları məsələyə çox ciddi yanaşmalıdırlar. Heç bir istedad kənarda qala bilməz. Çünki insan kapitalı damcı-damcı toplanır. Hər istedad bir töhfədir və bu insan kapitalı təkcə şəxsə aid olan termin deyil, bu həm də sosial termindir".
