Birinci “Yüksəliş” müsabiqəsinin qalibi tələbələrlə görüşüb - FOTO
“Yüksəliş” müsabiqəsi qaliblərinin tələbələrlə Mentorluq proqramının növbəti görüşü keçirilib. Birinci “Yüksəliş” müsabiqəsinin qalibi Semral Əliyev proqrama qəbul olunan Bakı Dövlət Universitetinin tələbələri Mirsəid Fərhadlı və Yusif Əkbərovla tanışlıq görüşü keçirib.
tehsilmedia.info Semral Əliyev Birləşmiş Millətlər Təşkilatının İqtisadi və sosial məsələlər üzrə departamentinin Dövlət institutları və rəqəmsal hökumət sektoru ilə BMT-nin Asiya və Sakit okean üzrə İqtisadi və Sosial Komissiyası tərəfindən birgə keçirdiyi tədbirdə iştirakından danışaraq tələbələrlə innovasiyaların tətbiqinə dair Azərbaycan təcrübəsi barədə müzakirələr aparıb. "ASAN xidmət"in ölkədə və beynəlxalq arenada təşkil etdiyi yeni layihələrin növbəti hazırlıq prosesində tələbələri məlumatlandıracağını bildirib. Mentor Semral Əliyev Mentorluq proqramının gələcək gedişatı ilə bağlı atılacaq addımları bölüşüb.Tələbələr isə öz növbəsində ixtisas artımı istiqamətində yararlı olacaq layihələrdə iştirak etməkdə maraqlı olduğunu qeyd edib, Mentorluq proqramı çərçivəsində yaradılan imkana və səmimi görüşə görə təşəkkürünü bildiriblər.
Tələbələr üçün Mentorluq proqramının əsas məqsədi 3-cü və 4-cü kurs tələbələrinin “Yüksəliş” müsabiqəsinin qaliblərinin idarəçilik təcrübəsindən yararlanmasını və gələcək karyera fəaliyyəti ilə bağlı tövsiyələr almasını təmin etməkdir. Mentorluq proqramının sonunda “Yüksəliş” müsabiqəsinin qalibləri tərəfindən tələbələrə tövsiyə məktubu təqdim ediləcək.
“Yüksəliş” müsabiqəsinin təşəbbüsü ilə start götürən proqrama 65 nəfər tələbə qəbul olunub. Seçim tələbələrin tərcümeyi-halı və motivasiya məktublarına əsasən həyata keçirilib. Proqramın 2024-cü ilin iyun ayının sonunadək davam etməsi gözlənilir.
Qeyd edək ki, “Yüksəliş” müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixində imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.
