Müəllim adına NÖVBƏTİ LƏKƏ: Ramanadakı məktəbdə azyaşlı qız uşağını tanınmaz hala kim salıb? - FOTOLAR

Son günlər məktəb və bağçalarda uşaqların döyülməsi faktlarına tez-tez rast gəlinir. Gah bağçadakı tərbiyəçilər azyaşlı uşaqlara şiddət göstərirlər, gah da şagirdlər məktəbdə müəllimlərin fiziki zorakılığına məruz qalırlar. Bütün bu faktlarla bağlı Təhsil Nazirliyi və digər aidiyyatı qurumlar tərəfindən ciddi tədbir görülmədiyi üçün belə zorakı “pedaqoq”ların əl-qolu daha da açılır. Bu halda isə uşaqlar həm fizioloji, həm də psixoloji olaraq ciddi problem yaşayır.

tehsilmedia.info xəbər verir ki, növbəti belə qəddar hadisə Ramanadakı 90 nömrəli orta məktəbdə baş verib. Sosial şəbəkələrdə yayılan məlumatlara görə, adı hələlik açıqlanmayan ikinci sinif şagirdini döyərək ağır xəsarət yetiriblər. Nəticədə azyaşlı qız uşağı göz nahiyəsindən ciddi zədə alıb. Onun hər iki gözündə və gözətrafı nahiyədə xəsarətlərin olduğu yayılan fotolardan açıq-aşkar görünür.

İddiaya görə, adıçəkilən məktəbin direktoru Svetlana Nəbiyeva uşağın valideyni ilə " anlaşmağa" çalışır. Çox güman ki, direktor müəyyən təmənna qarşılığında uşağın valideynlərini məsələni ictimailəşdirməməyə razı salmağa səy göstərir. Amma yəqin ki, aidiyyatı qurumlar məsələni dərhal nəzarətə götürərək bu cinayəti törədən məktəb rəhbərliyi və ya “müəllim” haqqında ciddi tədbir görəcəklər. Çünki məktəb şagirdinə, özüdə azyaşlı qız uşağına qarşı bu cür addımın atılması qətiyyən yolverilməzdir və bu əməli törədənlər gələcəyimizin yetişdiyi məktəb və bağçalarda qətiyyən işləməməlidirlər. Bu cür şəxslər müəllim adına ləkə gətirməkdən başqa bir işə yaramırlar.



Müşviq Tofiqoğlu