167 illik riyazi məsələ süni intellektlə isbat edilib
“Anthropic” şirkətinin riyaziyyatçısı Levent Alpöge 167 il əvvəl irəli sürülmüş Riman hipotezinin isbatını süni intellektin köməyi ilə tapdığını bildirib. Riyaziyyatçılar hazırda onun təqdim etdiyi isbatı yoxlayırlar.
Tehsilmedia.org xəbər verir ki, Alpöge şəxsi saytında tədqiqatın son mərhələsində həlledici addımlardan birini “Claude” süni intellekt modelinin təklif etdiyini yazıb. O, gəldiyi nəticəni belə ifadə edib: “Hesab edirəm ki, «Claude» ilə birlikdə işləyərək Riman hipotezinin isbatını tapmışam”.
Riyaziyyatçının sözlərinə görə, eyni üsulla ümumiləşdirilmiş Riman hipotezini də isbat etmək mümkündür. Alpöge isbatın hər addımını kompüterdə yoxlamağa imkan verən kodu 14 hissədən ibarət arxiv şəklində paylaşıb və kod “Lean” dilində yazılıb. O, isbatın gedişini izah edən mətn də hazırlamağı planlaşdırır.
Qeyd edək ki, Bernhard Rimanın 1859-cu ildə irəli sürdüyü hipotez sadə ədədlərin paylanması ilə bağlıdır. Hipotez isbat olunarsa, istənilən ədədə qədər neçə sadə ədəd olduğunu təxmini hesablayarkən nəticənin həqiqi saydan nə qədər fərqlənə biləcəyini daha dəqiq müəyyən etmək mümkün olacaq.




























