BDU-nun şəhid məzunu Cavid Manafovun məzarı ziyarət olunub
Bakı Dövlət Universitetinin (BDU) Sosial elmlər və psixologiya fakültəsinin müəllim və tələbələri fakültənin şəhid məzunu Cavid Manafovun məzarını ziyarət ediblər.
Bu barədə "tehsilmedia.info" a BDU-dan bildirilib.
Sosial elmlər və psixologiya fakültəsinin dekan müavini Nəzakət Kərimova, dosent Ülviyyə Ağabəyova, fakültənin Tələbə Həmkarlar İttifaqının sədri Heydər Aslanov, tələbələr Keşlə Şəhidlər Xiyabanında Cavid Manafovun məzarı önünə gül dəstələri düzüb, xatirəsini ehtiramla yad ediblər. Daha sonra onlar Cavid Manafovun ailə üzvləri ilə görüşüb, qürur mənbəyimiz olan şəhidlərimizin yaddaşlarda əbədi yaşayacağını bildiriblər.
Qeyd edək ki, Cavid Manafov Vətən müharibəsində Füzuli, Cəbrayıl, Zəngilan və Qubadlı istiqamətində gedən döyüşlərdə iştirak edib. 2020-ci ilin oktyabrın 31-də batareya komandirini və digər döyüş yoldaşlarını xilas edərkən ağır yaralanıb, noyabrın 7-də şəhid olub. O, 2016-2020-ci illərdə BDU-nun Sosial elmlər və psixologiya fakültəsində təhsil alıb.
