Bakı Ali Neft Məktəbinin tələbəsi Azərbaycanı Dohada təmsil edəcək

SOCAR-ın Bakı AIi Neft Məktəbinin (BANM) İnformasiya təhlükəsizliyi ixtisasının III kurs tələbəsi Azər Sadıxzadə Çinin “Huawei” şirkətinin Qətərin Doha şəhərində keçirəcəyi “Gələcəyin toxumları” (Seeds for the Future) yarışında Azərbaycan komandasının kapitanı seçilib.

tehsilmedia.info xəbər verir ki, proqramın Bakıda keçirilən seçim mərhələsinə Bakı Ali Neft Məktəbinin Proseslərin avtomatlaşdırılması mühəndisliyi kafedrasının müdiri Nailə Allahverdiyevanın rəhbərliyi ilə İnformasiya təhlükəsizliyi ixtisasının 3 tələbəsi - Əsmər Hacızadə, Azər Sadıxzadə və Elnur Bədəlov qatılıb.

Yarışda hər tələbəyə 10 dəqiqə, tələbələrin çıxışı üçün 5 dəqiqə, münsiflərə isə sual vermək üçün 5 dəqiqə vaxt verilib. Münsiflər tərəfindən tələbələrin dil səviyyəsi və ünsiyyət bacarıqları qiymətləndirilib.

Nəticədə Azər Sadıxzadə yüksək nəticə göstərib və müxtəlif universitetlərin tələbələrinin də iştirak etdiyi Azərbaycanı təmsil edən 5 nəfərlik komandanın kapitanı seçilib.

Qeyd edək ki, “Huawei” şirkəti bu il sentyabr ayında Qətərin Doha şəhərində “Gələcəyin toxumları” (Seeds for the Future) adlı 8 günlük təlim proqramı təşkil edəcək. Bu proqram çərçivəsində Azərbaycanlı tələbələr “Huawei” tərəfindən hazırlanmış İKT biliklərinə yiyələnəcəklər.

Azərbaycanı bu yarışmada seçilən 5 tələbə təmsil edəcək. Yarışma 3 mərhələdən ibarətdir. Qaliblərin “Huawei”in Çinin Şenzen şəhərində yerləşən Baş ofisinə səfərləri nəzərdə tutulub.