Sumqayıtda şəhid xanımları ilə görüş keçirilib

Azərbaycan Respublikası Elm və Təhsil Nazirliyi Təhsilin İnkişafı Fondu və Abşeron-Xızı Regional Təhsil İdarəsinin birgə təşkilatçılığı ilə şəhid həyat yoldaşları ilə görüş keçirilib.

tehsilmedia.info xəbər verir ki, Sumqayıt şəhər 11 nömrəli məktəbdə keçirilən görüşdə Azərbaycan Respublikası Elm və Təhsil Nazirliyi Təhsilin İnkişafı Fondunun rəhbəri Elnur Nəsibov və general-mayor Polad Həşimovun həyat yoldaşı, Bakı şəhəri üzrə Təhsil İdarəsinin əməkdaşı Ofelya Salmanova iştirak ediblər.
Görüşdə çıxış edən Abşeron-Xızı Regional Təhsil İdarəsinin müdiri İlhamə Abdullayeva dövlətimiz tərəfindən şəhid ailələrinə göstərilən diqqət və qayğıdan söz açıb, vətən uğrunda canından keçən oğullarımızın xatirəsinin hər zaman ehtiramla yad olunduğunu diqqətə çatdırıb. İ.Abdullayeva bildirib ki, şəhidlərimiz kimi, onların valideynləri, xanımları, övladları da dəyərlidir, əzizdir. İdarə müdiri şəhid anaları və xanımları ilə mütəmadi görüşlərin keçirilməsinin də məhz onlara olan böyük ehtiramın təcəssümü olduğunu qeyd edib.

Sonra Azərbaycan Respublikası Elm və Təhsil Nazirliyi Təhsilin İnkişafı Fondunun rəhbəri Elnur Nəsibov çıxış edərək məlumat verib ki, Fond şəhid ailələrinə və övladlarına dəstək göstərməyi prioritet istiqamət kimi müəyyən edib. Bildirilib ki, şəhid həyat yoldaşı olan qadınların həm təhsil almalarına, həm də işlə təmin olunmalarına xüsusi diqqət yetirilir.
Daha sonra çıxış edən general-mayor Polad Həşimovun həyat yoldaşı, Bakı şəhəri üzrə Təhsil İdarəsinin əməkdaşı Ofelya Salmanova “Şəhid xanımlarına dəstək” layihəsinin ictimai əhəmiyyət və faydasından söz açıb.

Görüşdə çıxış edən şəhid xanımları göstərilən diqqətə görə öz minnətdarlıqlarını bildiriblər.

Fəridə Ağaxanlı