Azərbaycanda bu tələbələrə 3 min manat təqaüd VERİLƏCƏK

Xəbər verdiyimiz kimi, Prezident İlham Əliyevin 26 iyun 2023-cü il tarixli sərəncamı ilə tələbələr üçün “Heydər Əliyev adına təqaüd” təsis edilib.

Sözügedən təqaüd Azərbaycan Respublikasının ali təhsil müəssisələrində ali təhsilin bakalavriat (əsas (baza ali) tibb təhsili) səviyyəsində əyani formada təhsil alan, təhsildə yüksək nailiyyətləri olan 100 (yüz) nəfər tələbə üçün nəzərdə tutulub.

tehsilmedia.info xəbər verir ki, Baş nazir Əli Əsədov sərəncamın icrasının təmin edilməsini təsdiqləyib.

Belə ki, Baş nazirin dünən imzaladığı sərəncama əsasən, Elm və Təhsil Nazirliyi Azərbaycanın ali təhsil müəssisələrində ali təhsilin bakalavriat (əsas (baza ali) tibb təhsili) səviyyəsində əyani formada təhsil alan, təhsildə yüksək nailiyyətləri olan 100 (yüz) nəfər tələbə üçün təsis edilmiş “Heydər Əliyev adına təqaüd”ün verilməsi ilə bağlı maliyyələşmə zərurəti yarandıqda, bu barədə təkliflərini Nazirlər Kabinetinə təqdim edəcək.

Sərəncamın icrası Nazirlər Kabineti Aparatının Hüquq və qanunvericilik şöbəsinə həvalə edilib.

Qeyd edək ki, təqaüd Elm və Təhsil Nazirliyi tərəfindən Azərbaycan dövlət büdcəsinin vəsaiti hesabına 3 000 manat məbləğində birdəfəlik veriləcək.