Xüsusi qabiliyyət imtahanları davam edir
Bakı şəhərində ali təhsil müəssisələrinin təsviri sənət istiqamətinin dekorativ tətbiqi sənət ixtisasının rəsm fənni üzrə qabiliyyət imtahanı davam edir.
Dövlət İmtahan Mərkəzindən "tehsilmedia.info"a bildirilib ki, bu gün, həmçinin ali təhsil müəssisələrinin magistratura səviyyəsinə 70-ci proqram üzrə ixtisaslaşmalara qəbul üçün Azərbaycan Dövlət Rəssamlıq Akademiyasında qabiliyyət imtahanı keçirilir.
Ali təhsil müəssisələrinin teatr, kino və xoreoqrafiya istiqamətləri üzrə qabiliyyət imtahanları da Bakı şəhəri 189-190 nömrəli tam orta məktəbdə keçirilir.
İyunun 19-dan etibarən Azərbaycan Dövlət Bədən Tərbiyəsi və İdman Akademiyasında ali təhsil müəssisələrinin bədən tərbiyəsi və idman istiqamətinin 63-cü komissiyası (Fiziki tərbiyə və çağırışaqədər hazırlıq müəllimliyi) üzrə də imtahanlara start verilib.
Ümumi (9 illik) orta təhsil bazasında orta ixtisas təhsili müəssisələrinin musiqi sənəti istiqamətinə aid komissiyalar üzrə Şəki, Naxçıvan, Gəncə və Lənkəranda imtahanlar keçirilir. Musiqi sənəti istiqaməti üzrə regionlarda olan imtahanlar onlayn qaydada təşkil olunur və iyunun 25-dək davam edəcək.
Qeyd edək ki, ali təhsil müəssisələrinin xüsusi qabiliyyət tələb edən ixtisasları üzrə 19 min 493 nəfər, orta ixtisas təhsili müəssisələrinin 11 illik təhsil bazasında ixtisasları üzrə 3850, 9 illik təhsil bazasında ixtisaslar üzrə isə 5470 abituriyent qeydiyyatdan keçib.
Xüsusi qabiliyyət tələb edən ixtisaslar üzrə müsabiqənin keçirilmə şərtləri haqqında “Abituriyent” jurnalının xüsusi buraxılışlarında ətraflı məlumat verilib.
