ƏDALƏT

Biz illərdir təhsildə baş verən nöqsanlara, yanlışlıqlara və cəmiyyətin gələcəyinə vurulan zərbələrə qarşı sözümüzü demişik. Çünki təhsil bir nazirin, bir məmurun, yaxud hansısa vəzifə sahibinin şəxsi mülkü deyil. Təhsil bu xalqın gələcəyidir, dövlətin sabahıdır, valideynlərin ümididir.

Biz susmadıq. Gördüklərimizi yazdıq, suallar verdik, cavab tələb etdik. Bəzən qarşımıza sədd çəkildi, bəzən sözümüzü eşitmək əvəzinə bizi gözdən salmağa çalışdılar. Hətta həqiqətin arxasınca gedənləri qeyri-ciddi adam, jurnalistikanın adını ləkələyənləri isə özlərini media nümayəndəsi kimi təqdim edənlərin yanında, bizi də reket adlandırmağa cəsarət edənlər tapıldı. Amma bir həqiqəti unutdular: insanın adını ləkələməyə çalışmaq onun dediyi həqiqəti yox etmir.

Əgər qaldırdığımız məsələlər əsassızdırsa, buyurun, faktlarla cavab verin! Əgər yazdıqlarımız yanlışdırsa, sənədlərlə təkzib edin! Jurnalisti etiketləmək, onu gözdən salmağa çalışmaq, ictimai suallardan yayınmaq heç bir problemi həll etmir. Əksinə, cavabsız qalan hər sual cəmiyyətdə daha böyük şübhələr yaradır.

Biz heç kimin kreslosuna göz dikməmişik, heç kimin qarşısında baş əymək üçün qapı döyməmişik. Bizim tələbimiz sadədir: təhsilə cavabdeh olanlar gördükləri işə görə hesabat versinlər, dövlətin vəsaiti xərclənirsə, onun nəticəsi də göstərilsin, məktəblərdə problem varsa, onun üstü örtülməsin.

Bəli, bəzən həqiqəti söyləyənlərə həqiqətin özündən daha sərt münasibət göstərilir. Çünki bəzi adamlar tənqidi eşitməkdənsə, tənqid edənin adını müzakirəyə çıxarmağı üstün tuturlar. Beləcə, problemin mahiyyəti unudulur, diqqət onu gündəmə gətirənə yönəldilir. Ancaq biz bir şeyi yaxşı bilirik: bu gün deyilən söz sabah sənədə, fakt isə tarixə çevrilə bilər. Vəzifələr dəyişər, insanlar gedər, kürsülər boşalar. Amma görülən işlər, verilən qərarlar və cavabsız qalan suallar öz izini saxlayar.

Bizim mübarizəmiz şəxslərlə deyil, haqsızlıqla; məqsədimiz kimisə gözdən salmaq deyil, təhsildəki problemləri üzə çıxarmaqdır.

Ədalət istəyiriksə, əvvəlcə həqiqətdən qorxmamalıyıq. Jurnalistin sual verməsini təhqir sayanlar bilməlidirlər ki, ictimai nəzarət düşmənçilik deyil. Tənqid isə düşmənçilikdən yox, məsuliyyətdən doğanda cəmiyyətin xeyrinədir.

Və nəhayət, bir daha deyirəm: bizi necə adlandırmaları yox, hansı həqiqətləri üzə çıxarmağımız önəmlidir. Bizim adımıza kölgə salmağa çalışanlar özlərini müdafiə edə bilərlər, amma təhsilin sabahı ilə bağlı sualları susdura bilməzlər. Çünki ədalət kiminsə bizə verdiyi imtiyaz deyil. Ədalət bizim haqqımızdır. Həqiqəti demək isə nə cinayətdir, nə də utanılacaq bir iş.

Susmağımızı gözləyənlərə bir sözümüz var: biz şəxslərin qarşısında deyil, həqiqətin yanında dayanmışıq. Və həqiqətin yanında dayanmaqdan utanmayacağıq.