Alimlər DNT-dən yaddaş qurğusu hazırladılar: 100 dəfə az enerji sərf edir
ABŞ-də alimlər süni DNT molekullarını yarımkeçirici materialla birləşdirərək ənənəvi texnologiyalarla müqayisədə daha az enerji sərf edən yeni yaddaş qurğusu hazırlayıblar.
Tehsilmedia.com xəbər verir ki, bu barədə ScienceDaily Penn State Universitetinin alimlərinin apardığı araşdırmaya istinadən məlumat yayıb.
Tədqiqatçılar sintetik DNT-ni kristal perovskit adlı yarımkeçirici materialla birləşdiriblər. Hazırlanan biohibrid qurğu məlumatların həm saxlanmasına, həm də emalına eyni məkanda imkan verir.
Alimlərin sözlərinə görə, yeni texnologiyanın əsas üstünlüklərindən biri olduqca aşağı enerji sərfiyyatıdır. Qurğunun gələcəkdə süni intellekt sistemləri və yeni nəsil kompüterlərdə enerji səmərəliliyinin artırılmasına töhfə verə biləcəyi düşünülür.
Araşdırmada istifadə olunan sintetik DNT kommersiya baxımından əldə edilə bilən kimyəvi üsullarla hazırlanıb və elektron sistemlərdə konkret funksiyaları yerinə yetirmək üçün xüsusi genetik ardıcıllıqlardan istifadə olunub.
Tədqiqatçılar hesab edirlər ki, DNT-nin elektronika ilə birləşdirilməsi böyük həcmdə məlumatın daha az enerji ilə saxlanması və emalına imkan verə bilər. Bu isə xüsusilə süni intellekt texnologiyalarının sürətlə inkişaf etdiyi bir dövrdə mühüm əhəmiyyət daşıyır.
