Bağçalarda növbəyə yazılma niyə dayandırılıb? - MÜTDA

"Məktəbəqədər təhsil müəssisələrində qrupların komplektləşdirilməsi məqsədilə növbəyə yazılma prosesi müvəqqəti olaraq dayandırılıb".

AzEdu.az xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin (MÜTDA) Məktəbəqədər təhsilin təşkili şöbəsinin müdiri İlahə Rəsulova məlumat verib.

Növbəyə yazılma prosesinin müvəqqəti olaraq dayandırılması ilk dəfə baş vermir:

“Demək olar ki, bu, hər il tətbiq olunur. Belə ki, bağçalara qəbul üçün may ayında sistem dayandırılır. Çünki həmin vaxt məktəbə gedən və ya məktəbəhazırlıq qruplarına gedən uşaqlar sistemdən çıxarılır və yerlər boşalır.

İyun ayında isə sadəcə proqnozların hazırlanması məqsədilə sistem bağlanır. Bundan sonr a iyul ayında həm regionlar, həm də Bakı üzrə qəbul prosesi başlayır və sistem yenidən açılır. Bu il üçün 58 min 500 vakant yer elan olunub, hazırda isə 42 minə yaxın uşaq sistemə daxil edilib.

Əvvəlki illərdə olduğu kimi, bu il də avqustun 31-də sistem müvəqqəti olaraq bağlanır ki, artıq qruplarda neçə uşağın olacağı müəyyənləşdirilsin və komplektləşdirmə prosesi həyata keçirilsin.

Həmçinin, bu məsələ müəyyən mənada maliyyə ilə də bağlıdır. Belə ki, uşaqların qidalanması və müəllimlərin maaş alması məhz həmin uşaqların sayına əsaslanır. Ona görə də hər il avqustun sonları sistem bağlanır və təxminən iki həftə ərzində komplektləşdirmə aparılır. Sentyabrın 16-dan etibarən sistem yenidən açılacaq və il boyu mövcud boş yerlərə qəbul prosesi davam edəcək”.