BSU Naxçıvanda “İnklüzivliyə doğru növbəti addım” mövzusunda görüş keçirib
Martın 5-də Bakı Slavyan Universiteti (BSU) və Naxçıvan Muxtar Respublikasının Təhsil Nazirliyinin birgə təşkilatçılığı ilə Naxçıvan Dövlət Texniki Kollecində “İnklüzivliyə doğru növbəti addım” mövzusunda görüş keçirilib. Görüşdə ümumtəhsil məktəblərinin pedaqoji heyəti və psixoloqları iştirak edib.
Tədbirin moderatoru, BSU-nun Pedaqogika və psixologiya kafedrasının müdiri, professor Piralı Əliyev giriş nitqi ilə çıxış edərək, universitetin inklüziv təhsil konsepsiyası və bu istiqamətdə həyata keçirilən fəaliyyətlər barədə geniş məlumat verib.
BSU-nun rektoru Anar Nağıyev çıxış edərək Naxçıvan Muxtar Respublikasının ümumtəhsil məktəblərinin nümayəndələrini salamlayaraq, tədbirin təşkilinə göstərdiyi dəstəyə görə Naxçıvan Muxtar Respublikasının Təhsil Nazirliyinə və Naxçıvan Dövlət Universitetinin rəhbərliyinə təşəkkürünü bildirib. Rektor qeyd edib ki, bu görüşlər BSU-da 2022-ci ildən etibarən həyata keçirilən “İnklüziv təhsildən inklüziv cəmiyyətə (ITIC)” layihəsi çərçivəsində təşkil olunur və indiyədək Elm və Təhsil Nazirliyinin dəstəyi ilə dörd regional təhsil idarəsində analoji tədbirlər baş tutub. Rektor öz çıxışında pedaqoji profilli ali təhsil müəssisələrində inklüziv təhsil üzrə müəllim hazırlığının məzmununun təkmilləşdirilməsi, ümumtəhsil məktəblərində çalışan müəllimlərin inklüziv təhsil ehtiyaclarının müəyyən edilməsi və onların peşəkar bacarıqlarının artırılması istiqamətində dəstək mexanizmlərinin gücləndirilməsi kimi prioritet istiqamətləri vurğulamışdır. Həmçinin, inklüziv təhsilin təşviq edilməsi, şəbəkələşmə imkanlarının genişləndirilməsi və inklüziv cəmiyyətin formalaşdırılması prosesində ali təhsil müəssisələrinin üzərinə düşən vəzifələr haqqında bəhs edib.Tədbirdə Naxçıvan Muxtar Respublikasının Təhsil naziri Elxan Nəcəfov, BSU-nun Jurnalistika kafedrasının müdiri Vüqar Rəhimzadə, Naxçıvan MR Təhsil Nazirliyinin Ümumi təhsil sektorunun müdiri Gültəkin Rüstəmli, Naxçıvan şəhər 8 nömrəli tam orta məktəbin direktoru Günay Novruzova və Heydər Əliyev adına tam orta məktəbin psixoloqu Vəfa Qasımova çıxış edərək, inklüziv təhsilin əhəmiyyəti, onun cəmiyyətin inkişafında rolu, bu sahədə mövcud vəziyyət və qarşıya çıxan çətinliklər barədə ətraflı danışıblar. Eyni zamanda, inklüziv təhsilin təkmilləşdirilməsi, müəllimlərin bu istiqamətdə hazırlanması, inklüziv tədris mühitinin formalaşdırılması və əlçatanlığın artırılması ilə bağlı təkliflər səsləndiriblər.
Daha sonra inklüziv təhsilin mövcud vəziyyətinin dəyərləndirilməsi, regionlarda inklüziv təhsilin tətbiqi zamanı üzləşilən çətinliklər və onların həlli yollarının müəyyən edilməsi məqsədilə iştirakçılar arasında sorğular təqdim edilmişdir.
Görüş inklüziv təhsil sahəsində təcrübə mübadiləsi, perspektivlərin müzakirəsi və gələcək əməkdaşlıq imkanlarının dəyərləndirilməsi ilə yekunlaşıb.
