"Məqsədli şəkildə dini və ədəbiyyatı qarşı-qarşıya qoyurlar"

"Bu gün həm bizim ölkədə, həm də dünyanın müxtəlif yerlərində din məqsədli şəkildə həm fəlsəfə ilə, həm ədəbiyyatla, həm də digər anlayışlarla qarşı-qarşıya qoyulur. Yəni məqsədli şəkildə konflikt yaratmağa çalışırlar və göstərirlər ki, guya din fəlsəfənin və ədəbiyyatın əleyhinədir. Bu isə dini gözdən salmaq üçün atılan addımdır və həyata keçirilən yanaşmadır".

Redaktor.az xəbər verir ki, bu fikirləri deputat Ceyhun Məmmədov öz sosial şəbəkəsində açdığı canlı yayım zamanı bildirdi.

Deputat nəzərə çatdırdı ki, Qurani-Kərimdə şairlər haqqında həm müsbət, həm də tənqidi fikirlər var:

"Zamanında fəlsəfə meydana çıxanda bəzi İslam alimləri buna etiraz etdilər, amma sonradan anladılar ki, fəlsəfə də önəmlidir. Bu mənada prinsip etibarilə düşünürəm ki, bunların hər üçü həqiqət axtarışındadır. Hər üçü mənəvi keyfiyyətləri və mənəvi dəyərləri cəmiyyətə aşılamağa çalışır. Məqsədləri isə bəşəriyyətin mənən kamilləşməsi və zənginləşməsidir. Bu baxımdan onları qarşı-qarşıya qoymaq kökündən yanlışdır. Oxşar cəhətləri çoxdur, ziddiyyətli məqamlar isə demək olar ki, yoxdur. Hər üçünün başqa bir ortaq cəhəti də insanları düşünməyə, fikirləşməyə çağırmasıdır. Bu isə olduqca vacib və önəmli məsələdir".