“Azərbaycanca-Özbəkcə-Türkcə” danışıq kitabçası çapdan çıxıb

AMEA-nın Nəsimi adına Dilçilik İnstitutunun Türk dilləri şöbəsinin aparıcı elmi işçisi, filologiya üzrə fəlsəfə doktoru Günel Mirzəyevanın "Azərbaycanca-Özbəkcə-Türkcə” danışıq kitabçası çapdan çıxıb.

Bu barədə "tehsilmedia.info"a AMEA-dan bildirilib.

"Elmi şuranın qərarı ilə çap olunan danışıq kitabçasını hazırlayan fil.ü.f.d. dos. Günel Mirzəyeva, ideya rəhbəri akademik Kamal Abdullayev, elmi redaktoru Elçin İbrahimov, rəyçiləri fil.e.d., professor Sadət Muhammedova (Özbəkistan), fil.ü.f.d. professor İsmayıl Məmmədovdur.

Danışıq kitabçasında özbək yazısının qısa tarixçəsi, özbək dilinin latın qrafikası haqqında məlumat verilir. Bu danışıq kitabçasının özbək, Azərbaycan, türk xalqları arasında gediş-gəlişlərin və mədəni əlaqələrin artmasında, ən əsası da bu sahədə üçdilli lüğət boşluğunun doldurulmasında faydalı olacağına ümid edirik", - deyə məlumatda bildirilib.