Nizami Muzeyində Ömər Faiq Nemanzadəyə həsr olunmuş elmi seminar məşğələsi keçirilib

Nizami Gəncəvi adına Milli Azərbaycan Ədəbiyyatı Muzeyində tanınmış maarifçi, ictimai-siyasi xadim, publisist Ömər Faiq Nemanzadənin həyat və fəaliyyətinə həsr olunmuş elmi seminar məşğələsi keçirilib.

tehsilmedia.info xəbər verir ki, seminarda Nizami muzeyində təcrübə keçən Bakı Dövlət Universitetinin Şərqşünaslıq fakültəsinin Türk filologiyası üzrə tələbələri də iştirak ediblər.

Tədbirdə muzeyin Doktorantura və təhsil şöbəsinin böyük elmi işçisi, filologiya üzrə fəlsəfə doktoru Sevinc Heydərova "Əkinçi” qəzetindən "Molla Nəsrəddin” dərgisinə gedən yol” mövzusunda məruzə ilə çıxış edib. O, "Əkinçi” qəzetinin timsalında Azərbaycan milli mətbuatının yaranması və ondan sonra gələn digər nəşrlər haqqında məlumat verib.

Sevinc Heydərova görkəmli publisist, yazıçı, dramaturq Cəlil Məmmədquluzadə və Ömər Faiq Nemanzadənin təşəbbüsü ilə 1906-cı ildən nəşr olunan "Molla Nəsrəddin” satirik jurnalının yaranması və fəaliyyətindən də bəhs edib.

Sonda məruzəçi Ömər Faiq Nemanzadənin keşməkeşli ömür yolundan danışaraq, son zamanlar ədibin publisistikasının və fəaliyyətinin ədəbi ictimaiyyətdə yenidən maraq doğurduğunu və bir çox tədqiqatların yaranmasına səbəb olduğunu qeyd edib.