Məktəb çantası alarkən bunlara diqqət edin - Travmatoloqdan TÖVSİYƏ
"Ağır məktəb çantalarının daşınması uşaq orqanizmi üçün ziyanlı ola bilər. Həddindən artıq ağır məktəb çantası daşıyarkən uşağın onurğasına düşən yük bir neçə dəfə arta bilər. Bu zaman uşaq özündən asılı olmadan önə əyilir və onurğa əzələlərinə, fəqərə sütununa düşən yük normadan artıq olduğu üçün xroniki əzələ ağrılarına və ya spazmlara gətirib çıxara bilər".
Tehsilmedia.com redaktor.az-a istinadən xəbər verir ki, bunu Səhiyyə Nazirliyinin rəsmi instaqram səhifəsində canlı yayım zamanı Elmi-Tədqiqat Travmatologiya və Ortopediya İnstitutunun travmatoloq-ortopedi İlham Şıxbabayev bildirib.
O vurğuladı ki, məktəb çantaları uşağın bədən çəkisinə və boyuna uyğun olmalı, müəyyən standartlara cavab verməlidir:
"Həmçinin çantanın daşınma qaydalarına düzgün riayət edilməlidir. Məktəb çantaları mütləq iki kəmərli olmalı, kəmərlər enli və çantanın bel nahiyəsinə tam oturmasını təmin etməlidir. Məktəb çantasının uzunluğu, yəni ölçüsü də normanı keçməməlidir. Belə ki, çantanın aşağı hissəsi maksimum bel nahiyəsindən aşağı, çanaq nahiyəsinə qədər çata bilər. Çantanın daşınması zamanı da müəyyən qaydalara riayət edilməlidir. Çanta mütləq hər iki çiyinə taxılmalı, hər iki kəmər bir çiyində daşınmamalıdır. Çanta bir tərəfdə daşındıqda, xüsusilə uşaqlarda həmin tərəfdə əzələ gərginliyi və əzələ ağrıları yarana bilər. Həmçinin məktəb çantası daşınarkən bel nahiyəsinə tam oturmalıdır. Ağır kitabların çantanın arxa hissəsinə, yüngül dəftərlərin isə kitabların önünə yerləşdirilməsi məsləhət görülür.
Məktəb çantasının çəkisi uşağın maksimum bədən çəkisinin 10-15 faizini keçməməlidir. Mütəxəssislər tərəfindən ən çox tövsiyə olunan göstərici 10 faizdir. Belə ki, məsələn, 30 kiloqramlıq bir uşaq üçün məktəb çantasının çəkisinin 3 kiloqram olması məsləhət görülür".
