Peşə təhsili ilə bağlı yeni trendlər

Dövrün tələbləri dəyişir. Yeni peşələrə tələbat artır. Bu peşələri öyrənmək üçün universitet oxumağa ehtiyac yoxdur. Peşə məktəblərində də həmin sahədə təhsil almaq mümükündür.

 

Universitetə qəbul ola bilməyənlərin özlərini inkişaf etdirməyi üçün peşə məktəbləri böyük rol oynayır. Həmin öyrədilən peşələr də gəlirli sahələrdir. Peşə təhsili müəssisələrinə qəbul olanların sayı da artır.  2018-ci ildə 14 min qəbul var idisə, ötən il bu rəqəm 20 minə çatıb. Bu, 30-35 faiz artım deməkdir. Mütəxəssislər deyir ki, getdikcə ixtisaslara maraq və tələbat dəyişir.

 

İnsan resursları üzrə mütəxəssis İlkin Məcidov bildirib ki, sabit cərəyandan istifadə azalıb. Dəyişkən cərəyana keçid edilib. Onun sözlərinə görə,  kibertəhlükəsizlik və dizayn sahəsinə maraq artıb. Peşə təhsil mərkəzlərində tələbələr əsasən avtomobil sahəsinə maraq göstərirlər. Peşə təhsil mərkəzlərində dərslər əsasən praktiki keçirilir. Bununla yanaşı, tələbələrə nəzəri biliklər də verilir. Peşə Təhsili üzrə Dövlət Agentliyindən bildirildi ki, ötən il 7 yeni ixtisas üzrə tədrisə başlanılıb. 

Təhsil eksperti Elçin Əfəndi qeyd edib ki, bəzi təhsil müəssisələrində köhnə adət-ənənələr qalıb. Bu ənənələrin ləğv edilməsi və yeni ixtisasların yaranması agentliyin diqqət mərkəzində olmalıdır. Bir çox peşə məktəblərində kadr hazırlığı əmək bazarına uyğundur. Əmək bazarı ilə ayaqlaşmayan peşə məktəblərində də yeni ixtisaslar yaradılmalıdır.