Azərbaycan dili və informatika fənləri üzrə hazırlıq kurslarının növbəti məşğələləri keçirilib

Dövlət İmtahan Mərkəzində Azərbaycan dili fənni üzrə buraxılış və qəbul, informatika fənni üzrə isə qəbul imtahanlarında istifadə edilən qiymətləndirmə tapşırıqlarının hazırlanması, ekspertizası və yoxlanılmasına dair hazırlıq kurslarının növbəti məşğələləri keçirilib.

DİM-dən "tehsilmedia.info" a bildirilib ki, hazırlıq kurslarında yalnız elektron qeydiyyatdan keçmiş, ixtisası müvafiq fənnə uyğun olan müəllimlər, metodistlər və pedaqoji profilli ali təhsil müəssisələrinin bakalavriat səviyyəsinin müvafiq fənlər üzrə təhsil alan sonuncu kurs tələbələri və magistrlər iştirak ediblər.

Azərbaycan dili fənni üzrə hazırlıq kursunda DİM-in şöbə müdiri Afiqə Batıyeva kursun sonuncu mərhələsi (kalibrləmə mərhələsi) haqqında kurs iştirakçılarına ətraflı məlumat verib. Daha sonra DİM-in şöbə müdiri Aydın Qasımov "Azərbaycan Respublikasında buraxılış və qəbul imtahanlarında yazı işlərinin qiymətləndirilməsi texnologiyası” mövzusunda təqdimatla çıxış edib. Təqdimat kurs iştirakçıları tərəfindən maraqla qarşılanıb. Onları maraqlandıran suallar cavablandırılıb.

Daha sonra Bakı şəhəri üzrə qeydiyyatdan keçmiş iştirakçıların bir hissəsi cavabı yazı ilə ifadə olunan tapşırıqların kompüterdə xüsusi proqram vasitəsilə yoxlanılması (kalibrləmə) prosesindən keçiblər. Regionlardan olan iştirakçılar DİM-in müvafiq Regional bölmələrində kalibrləmə prosesindən keçəcəklər.

İnformatika fənni üzrə hazırlıq kursunda isə moderator Anar Rəşidov "Python" proqramlaşdırma dilində "List" mövzusunda təqdimatla çıxış edib. İştirakçıları maraqlandıran suallar moderator tərəfindən cavablandırılıb.