Məleykə Abbaszadə ilə Arnold Brauer arasında görüş keçirilib
Azərbaycan Respublikası Prezidentinin 2022-ci il 22 iyul tarixli 3378 nömrəli Sərəncamı ilə təsdiq edilmiş “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın 3.1.9-cu fəaliyyət istiqamətinin (dövlət qulluğunda və iqtisadi idarəetmədə effektivliyin artırılması) 3-cü bəndində nəzərdə tutulmuş tədbirin (dövlət qulluğunda sertifikasiya sisteminin təkmilləşdirilməsi) icrası üzrə Dövlət İmtahan Mərkəzi əsas icraçı qurum olaraq müəyyən edilmişdir. Nəzərdə tutulmuş tədbirin icrası çərçivəsində Dövlət İmtahan Mərkəzi tərəfindən hazırda tətbiq olunan sertifikasiya sisteminin monitorinqinin aparılması və mümkün təkmilləşdirmə yollarının müzakirə olunması, o cümlədən ümumi səriştələr üzrə situasiya mühakimə testlərinin (SMT) yazılması (müsahibələrin keçirilməsi, ekspertizası, ilkin approbasiyası) üzrə aparılan işlərin yoxlanılması, rəy və tövsiyələrin verilməsi məqsədilə Niderlandın İmtahan və Sertifikatlaşdırma üzrə Tədqiqat Mərkəzinin (RCEC - Research Centre for Examination and Certification) direktoru cənab Arnold Brauer 20-23 noyabr 2023-cü il tarixlərində Dövlət İmtahan Mərkəzində işgüzar səfərdə olub.
tehsilmedia.info xəbər verir ki, DİM-dən AzEdu.az-a bildirilib ki, səfər çərçivəsində Niderlandın İmtahan və Sertifikatlaşdırma üzrə Tədqiqat Mərkəzinin direktoru Arnold Brauerlə DİM-in Direktorlar Şurasının sədri Məleykə Abbaszadə arasında görüş keçirilib və əməkdaşlıq istiqamətləri üzrə müzakirələr aparılıb. Görüşdə həmçinin Direktorlar Şurası sədrinin müşaviri və müvafiq struktur bölmələrin rəhbərləri iştirak ediblər.
Səfər zamanı beynəlxalq ekspert DİM-də yaradılmış milli qiymətləndirmə sisteminin tarixini əks etdirən muzey ilə tanış olub. Sonra isə ekpsertə DİM-in müxtəlif struktur bölmələrinin fəaliyyəti barədə məlumat verilib və qiymətləndirmə üzrə görülən işlərin keyfiyyətinin, bütövlüyünün və təhlükəsizliyinin təmin olunması üçün mərkəzdə yaradılmış şərait nümayiş olunub.
Səfər çərçivəsində səriştələr üzrə situasiya mühakimə testlərinin (SMT) yazılması üzrə görülən işlərlə bağlı müvafiq struktur bölmələrin əməkdaşlarının iştirakı ilə görüşlər keçirilib. Görüşlər zamanı hazırda tətbiq olunan sertifikasiya sisteminin və yeni səriştə modelinin təhlil və təkmilləşdirilməsi üzrə fikir mübadiləsi aparılıb, SMT-lərin yazılması üzrə treninqlərin keçirilməsi və bu istiqamətdə araşdırmaların aparılması istiqamətində gələcək əməkdaşlıq imkanları müzakirə olunub.
Bundan əlavə, DİM tərəfindən təşkil olunan imtahanların keyfiyyətinin 2021-ci ildə “RCEC” tərəfindən auditinin aparılması və DİM-ə müvafiq keyfiyyət nişanını əks etdirən sertifikatın təqdim olunmasını nəzərə alaraq, səfər zamanı müvafiq struktur bölmələrin rəhbərləri və əməkdaşları ilə Arnold Brauerin görüşü təşkil olunub. Görüş zamanı “RCEC” tərəfindən audit hesabatında təqdim olunan tövsiyələr və gələcək əməkdaşlıqla bağlı müzakirələr aparılıb.
