BDU “Erasmus+ DIRNA” layihəsinin ilk görüşündə iştirak edib - FOTO
Bakı Dövlət Universitetinin (BDU) Elmi Kitabxanası Avropa İttifaqının “Erasmus+KA2” proqramının “Azərbaycanda institusional repozitoriyalar şəbəkəsi vasitəsilə tədqiqat potensialının inkişafı” (DIRNA) adlı layihəsinin Xəzər Universitetində keçirilən ilk idarəedici görüşündə iştirak edib.
Bu barədə "tehsilmedia.info"a BDU-dan məlumat verilib.
Bildirilib ki, üç il davam edəcək layihənin məqsədi tərəfdaş ölkələrin – Türkiyə, İtaliya və Finlandiyanın təcrübəsi əsasında Azərbaycanın layihədə iştirak edən ali təhsil müəssisələrində hamıya əlçatan institusional repozitoriyalar (elektron arxivlər) şəbəkəsinin yaradılması və tədqiqat nəticələrinin idarə edilməsində universitetlərin tədqiqat potensialının artırılmasıdır.
Tədbirin açılış hissəsində Xəzər Universitetinin təsisçisi Hamlet İsaxanlı, universitetin rektoru İradə Xəlilova və Azərbaycan Milli ERASMUS+ ofisinin direktoru Pərviz Bağırov çıxış ediblər. Avropa Komissiyasının layihə koordinatoru Rosalba Nardelli görüşə onlayn qoşulub və tərəfdaş universitetlərə uğurlar diləyib.
Görüşdə layihənin qalibi olan tərəfdaş universitetlərin - Bakı Dövlət Universiteti, Jyväskylä Universiteti (Finlandiya), İzmir Yüksək Texnologiya İnstitutu (Türkiyə), L'Akuila Universiteti (İtaliya), Azərbaycan Texniki Universiteti, Azərbaycan Dövlət Gömrük Akademiyası, Gəncə Dövlət Universiteti, Naxçıvan Dövlət Universiteti, Mingəçevir Dövlət Universiteti, Lənkəran Dövlət Universitetinin nümayəndələri təqdimatla çıxış ediblər.
İkigünlük görüş müddətində layihə çərçivəsində nəzərdə tutulmuş işlərin planı, maliyyə məsələləri, hər bir tərəfdaş universitetin layihədəki rolu və cavabdeh olduğu işlər, potensial risk və onların həll olunması yolları müzakirə olunub.
