UNEC-də Elmi şuranın yeni tədris ilində ilk iclası keçirilib
Azərbaycan Dövlət İqtisad Universitetində (UNEC) Elmi şuranın yeni tədris ilində ilk iclası keçirilib.
Bu barədə "tehsilmedia.info"a UNEC-dən məlumat verilib.
Rektor Ədalət Muradov iclasda yeni tədris ilinə hazırlıq, qarşıda duran əsas vəzifələr, eləcə də yay imtahan sessiyasının və yay semestrinin nəticələrinin və digər vacib məsələlərin müzakirə ediləcəyini diqqətə çatdırıb.
İmtahan Mərkəzinin direktoru Söhrab İsayev 2022/2023-cü tədris ilinin yaz imtahan sessiyasının nəticələrindən danışıb. Hesabatda tələbələrin fakültələr üzrə akademik nəticələri, sessiyanın nəticələrinin əvvəlki tədris illəri ilə müqayisəsi, müvəffəqiyyət göstəriciləri və s. barədə məlumat verilib. S.İsayev yeni tədris ilində tələbələrin biliyinin qiymətləndirilməsi qaydalarından da bəhs edib.
Sonra 2022/2023-cü tədris ilinin yay semestrinin yekunları barədə Qiyabi və Əlavə Təhsil Mərkəzinin direktoru Səbuhi Tanrıverdiyevin hesabatı dinlənilib. Bildirilib ki, hibrid formada təşkil olunan yay semestrində 70 fənn üzrə 1001 tələbə iştirak edib. Kənar universitetlərdən yay semestrində iştirak edən tələbələrin sayı 23 nəfər olub.
Tədris üzrə prorektor Gəray Musayev yeni tədris ilində qarşıda duran vəzifələr, eləcə də I kursa bakalavr və magistratura səviyyələri üzrə tələbə qəbulunun nəticələri haqqında hesabat verib. Qəbul faizlərinin sevindirici olduğunu deyən prorektor ötən illərlə müqayisədə magistratura səviyyəsinə qəbulun 15 faiz, bakalavriaturaya isə 10 faiz artdığını deyib. 600 və daha yüksək bal toplayan 217 abituriyentin UNEC-ə qəbul olduğunu deyən G.Musayev bu rəqəmin ötən 4 illə müqayisədə 17 faiz çox olduğunu diqqətə çatdırıb.
Rektorun müşaviri Elşən Bağırzadə “UNEC professoru vəzifəsi və onun tutulması haqqında Qaydalar”ına edilən dəyişikliklər barədə çıxış edib. Dəyişikliyə əsasən, “UNEC professoru” vəzifəsini tutmaq qaydaları müddətsiz professor tələblərinə uyğunlaşdırılıb.
E.Bağırzadə UNEC Diferensial Əməkhaqqı Sistemini, elmi fəaliyyətin qiymətləndirilməsi sistemində edilən dəyişiklikləri də diqqətə çatdırıb. Bildirib ki, ilin yekununda istinadların sayına görə (özünüistinadlar istisna olmaqla) I yerə 15 min, II yerə 10 min, III yerə görə isə 5 min manat birdəfəlik mükafat təsis edilib.
Elmi şura cari məsələlərin müzakirəsi ilə davam edib.
