Sənan Mənsimli və onun "sağ əli" Aqil Bəşirovun qanunsuz əməlləri bitmək-tükənmək bilmir
Şirvan-Salyan Regional Təhsil İdarəsinin müdiri Sənan Mənsimli və onun "sağ əli" Aqil Bəşirovun qanunsuz əməlləri haqda nə qədər yazsaq da, bitmək-tükənmək bilmir.
Sənan Mənsimli və Aqil Bəşirovun Biləsuvar rayon təhsilində etdiyi qanunsuzluqlar:
1. Biləsuvar rayon Amankənd kənd bağçasına orta ixtisaslı texnologiya müəllimini musiqi rəhbəri vəzifəsinə gətiriblər. Halbuki,bağçalar Təhsil nazirliyinin nəzdinə keçdikdən sonra işə qəbul müsabiqə vasitəsilə aparılmalı və bağçalara məktəbəqədər təhsil ixtisaslı şəxslər qəbul olunmalı idi.
2. Şəhər 4 saylı tam orta məktəbdə ali təhsilli fransız dili müəllimi xadimə olaraq işlədilir.
3. Aqil Bəşirov özü Şirvan Salyan regional təhsil idarəsində inzibati sektorda aparıcı məsləhətçi vəzifəsini daşısa da,eyni zamanda Biləsuvar rayon təhsil sektorunda əvəzedici müdir və Yuxarı Ağalı kənd ümumi orta məktəbində müəllim olaraq çalışır. Azərbaycan respublikasının əmək məcəlləsi işçiyə iki işdə işləməyə icazə verir. Əmək məcəlləsinin 162 maddəsi ilə tənzimlənən bu məsələyə görə işçi bir işdə tam ştatlı,digərində isə yarım ştat olaraq çalışa bilər(əvəzetmə). Bəs Aqil Bəşirov əmək məcəlləsinin ziddinə getdiyi halda hansı halda üç işdə eyni zamanda işləyə bilir? Aqil Bəşirovun işlədiyi işlərdən ikisinin 8 (səkkiz) saatlıq iş rejiminə malik olduğunu nəzərə alsaq, onun bu işlərdə necə çalışdığını təsəvvür eləmək belə çətindir.
4. Xırmandalı 2 nömrəli məktəbin katibəsini şəhər 3 nömrəli bağçaya müdir vəzifəsinə gətiriblər. Üstəlik də ixtisası uyğun olmaya-olmaya(ixtisas məktəbəqədər olmalıdır) və heç bir müsabiqədən keçirtmədən.
5. Şəhər 1 saylı tam orta məktəbində vakant olan psixoloq vəzifəsinə əvvəllər bu vəzifədə işləmiş bir şəxsi müsabiqədən kənar işə qəbul ediblər. Bu şəxs isə ümumiyyətlə rayon ərazisində yaşamır.
6. Aqil Bəşirov özü şəhər 4 saylı məktəbdə bu yaxınlarda aparılmış monitorinqin sədri olsa da, müəyyən adamlardan alınmış izahatlar akta əlavə edilməyib. Yüksək vəzifədə çalışan bir şəxsin həyat yoldaşından alınan izahat, təsdiqedici sənədlər nəyinsə müqabilində akta əlavə edilməyib.
7. Əsgərabad məktəbində uzun müddət xadimə işləmiş şəxsin adının işdə getməsinə baxmayaraq, Aqil Bəşirovun himayəsi ilə işə getməməsi.
8. Bəydili kənd məktəbində təşkilatçı müavin vəzifəsi iki ildir ki,vakant olmasına baxmayaraq,həmin yeri gizlədiblər, vakansiyaya çıxarılmayıb və orada 3 aylıq müddətli müqavilə ilə bir şəxsi çalışdırıblar və hələ də o yer vakansiyaya çıxarılmır və orada həmin şəxs işləyir.
9. Şəhər 2 saylı tam orta məktəbdə direktor müavini imtahanında iştirak etməyən bir şəxsi o vəzifəyə gətiriblər, işin üstü açılandan sonra isə vəzifədən könüllü imtina ilə bağlı ərizə alıblar.
10. Uzun müddət Zəhmətabad kənd bağçasında müdir işləmiş bir xanımı işdən azad ediblər (eyni zamanda müvəqqəti musiqi rəhbəri vəzifəsindən də). Onun yerinə isə başqa bir ixtisası uyğun olmayan şəxsi musiqi rəhbəri vəzifəsinə təyin ediblər.
11. Ağalı kənd tam orta məktəbin direktoru DİQ(direktorların işə qəbulu) imtahanından keçid balını belə toplaya bilməsə də, direktor təyin ediblər.
12. Yuxarı ağalı kənd ümumi orta məktəbin direktoru isə ümumiyyətlə heç DİQ(direktorların işə qəbulu) imtahanında da iştirak etməyib və ümumiyyətlə isə direktor işləmək üçün lazım olan 5 illik pedaqoji staja da malik deyil. Əslində isə Əmək və əhalinin sosial müdafiəsi nazirliyinin 20 dekabr 2017-ci il 18-1 saylı "Təhsil sahəsinə aid olan qulluqçu vəzifələrinin Vahid Tarif-İxtisas-Sorğu Kitabçasının təsdiq edilməsi barədə" qərarına əsasən, direktor işləmək üçün minimum 5 illik pedaqoji staj lazımdır.
13. İdarə və idarəyə tabe olan sektorlarda dövlət qulluğu yerlərini vakansiyaya çıxarmırlar və orada özlərinə loyal olan şəxslərlə işləyirlər.
14. Aqil Bəşirov pedaqoji işçilərin əmək haqqı cədvəllərinə qanunsuz olaraq imza atır. Halbuki, bunun üçün möhür, ştamp lazımdır yaxud da bunu baş mühasib etməlidir.
15. Amankənd məktəbinin direktorunun psixoloji, nevrotik pozulmalarla bağlı sənədləri olsa da, hələ də onun direktor olaraq işləməsinə göz yumur və şərait yaradırlar.
