"Övladımıza səlahiyyət verməli, etibar etdiyimizi göstərməliyik"

"16 yaşında bir uşaq sərbəst avtomobil istifadə edir və məktəbinə öz avtomobili ilə gedirsə, məktəbdən də çıxıb işə gedirsə, mən bu halı dəstəkləyirəm. Amerikada yaxşı valideyn dedikdə uşağı həyata hazırlayan valideyn nəzərdə tutulur. Bunun üçün isə valideyn uşağı qanun icazə verən kimi əmək fəaliyyətinə təşviq edir. Beləcə uşaq pul ilə münasibəti öyrənir. 16 yaşında övladına avtomobil sürməyi öyrədir və valideyn-övlad köməkləşib uşaq üçün bir avtomobil alırlar. Bəhs etdiyim əlbəttə yaxşı valideyndir. Tərsi olan nümunələr də çoxdur. Övlad 18 yaşına gəldikdə 4-5 yol ilə qarşılaşır. Bu yollardan biri özü və ailəsinin vəziyyəti ilə seçilməli olur".

tehsilmedia.info xəbər verir ki, bu fikirləri təhsilin idarə olunması üzrə mütəxəssis Qoşqar Məhərrəmov bildirib.

Onun sözlərinə görə, bizim isə əksəriyyətlə yaxşı valideyn anlayışımızda proseslərə ifrat dərəcədə müdaxilə nəzərə çarpır:

"Hamımız istəyirik ki, övladımız təhsilli olsun. Bu gözəldir, amma yetərli deyil. Bunun üçün övladımıza səlahiyyət verməli, səriştə qazanmağı üçün şərait yaratmalı, ona etibar etdiyimizi göstərməli, onu əmək fəaliyyətlərinə yönləndirməliyik. Hamı bilir, yenə bilək. Üzmək, avtomobil sürmək, velosiped sürmək, özünümüdafiə, yemək bişirmək, pulu idarə etmək dərslər qədər, bəlkə onlardan da vacib həyati bacarıqlardır. Ona görə də yaxşı olmağa çalışan valideynlər nəbadə övladlarının yerinə qərar versinlər. Etməyimiz lazım olan sadəcə övladlarımızın həyati fəaliyyətlərə qoşulmağını təmin etmək olmalıdır. Dərs çalışmaq, yatağı və ətrafını səliqəyə salmaq, kitab oxumaq, idman etmək, oyun oynamaq, film izləmək, internetdə gəzinmək hamısı balanslı şəkildə, valideyn nəzarətində uşaqların həyatında olmalıdır. Ən vacibi onların sərbəst seçim etmələrinə şərait yaratmağınızdır. Çünki siz həmişə onların yanında olmayacaqsınız. Kiçik səhv edib başları daşa dəyməyənə qədər səhvlərindən dərs çıxarmağı öyrənə bilməyəcəklər".