Beynəlxalq standartların Azərbaycanda tətbiqi qaydaları təsdiqləndi
Beynəlxalq, regional, dövlətlərarası və xarici dövlətlərin standartlarının Azərbaycan Respublikasının ərazisində tətbiqi Qaydaları təsdiq edilib.
Modern.az xəbər verir ki, Baş nazir Əli Əsədov bununla bağlı qərar imzalayıb.
Beynəlxalq standartın dövlət standartı kimi qəbul edilməsi əsasları aşağıdakılardır:
- standartlaşdırma obyektlərinə dair qüvvədə olan dövlət standartının olmaması və ya mövcud dövlət standartının beynəlxalq standartlarla ziddiyyət təşkil
etməsi;
- Azərbaycan Respublikasının standartlaşdırma üzrə beynəlxalq və regional təşkilatlarda üzvlüyü;
- müvafiq beynəlxalq standartın qəbulu və ölkədə tətbiqi üzrə öhdəliklərin Azərbaycan Respublikasının tərəfdar çıxdığı beynəlxalq müqavilələrdə təsbit
olunması.
- Dövlət standartı kimi qəbul edilən beynəlxalq standartlar Azərbaycan Respublikasının normativ hüquqi aktlarına və qüvvədə olan texniki reqlamentlərlə müəyyən edilmiş tələblərə zidd olmamalıdır.
Beynəlxalq standart müəlliflik hüquqlarının qorunması ilə əldə olunmalı, müvafiq beynəlxalq standartın orijinal nüsxəsinin birbaşa dövlət standartı kimi qəbul edilməsi istisna olmaqla, rəsmi nəşrlər əsasında tərcümə edilməlidir. Beynəlxalq standartların tərcüməsini maraqlı tərəflər və müraciəti təqdim edən texniki komitə təmin edir və onun autentikliyi milli standartlaşdırma qurumu tərəfindən təsdiq olunur.
Təsərrüfat subyektləri tərəfindən standartların rəsmi nəşri müvafiq qaydada milli standartlaşdırma qurumuna təqdim olunmadıqda onların tətbiqinə icazə verilmir.
Beynəlxalq standartların dövlət standartı kimi qəbul edilməsi üç üsulla həyata keçirilir:
- müvafiq beynəlxalq standartın orijinal nüsxəsinin autentik tərcüməsi əsasında dövlət standartının qəbul edilməsi;
- müvafiq beynəlxalq standarta texniki cəhətdən və struktur dəyişikliyi etməklə dövlət standartı kimi qəbul edilməsi;
- müvafiq beynəlxalq standartın orijinal nüsxəsinin birbaşa dövlət standartı kimi qəbul edilməsi.
Müvafiq beynəlxalq standartların orijinal nüsxələrinin birbaşa dövlət standartı kimi qəbul edilməsi onun titul vərəqini və müqəddimə bölməsini dövlət dilinə tərcümə etməklə dövlət standartı kimi qəbul edilməsi yolu ilə həyata keçirilir. Standartın cildində və birinci səhifəsində onun işarəsinin (AZS…) altında mötərizədə beynəlxalq standartın müvafiq işarəsi göstərilir.
Nazirlər Kabinetindən qərara verilən izahda bildirilib ki, qərar Azərbaycan Respublikasında beynəlxalq, regional, dövlətlərarası və xarici ölkələrin standartlarının tətbiqi mexanizmini tənzimləmək məqsədi daşıyır. Qərarla həmin standartların dövlət standartı kimi qəbul edilməsi, birbaşa tətbiqi, tərcüməsi, ekspertizası və reyestrə daxil edilməsi qaydaları müəyyən edilir.
Əsas məqsəd beynəlxalq standartların ölkədə tətbiqini sistemləşdirmək, milli qanunvericiliyə və texniki reqlamentlərə uyğunluğunu təmin etmək, eyni zamanda iqtisadiyyatın inkişafı və beynəlxalq inteqrasiyanı gücləndirməkdir. Qərar standartlaşdırma sahəsində şəffaflığı və hüquqi aydınlığı artırır.
