Şəhid tələbənin anım günüdür
19 dekabr Lənkəran Dövlət Universitetinin (LDU) şəhid tələbəsi Cəsarət Səfərovun anım günüdür. Cəsarət İkinci Qarabağ savaşında qəhrəmanlıqla döyüşərək şəhadət zirvəsinə yüksələn vətənpərvər gənclərimizdəndir.
Modern.az-ın məlumatına görə, Cəsarət Xaliq oğlu Səfərov 2001-ci il iyun ayının 27-də Bakı şəhərinin Suraxanı rayonunda anadan olub. Yaxınlarının dediyinə görə hələ orta məktəbdə oxuduğu illərdə Cəsarət təlim-tərbiyəsi, vətənpərvərliyi, səmimiyyəti ilə hər zaman seçilib və nümunəvi şagird kimi müəllimlərin sevimlisi olmağı bacarıb. Orta məktəb müəllimlərinin, şagird dostlarının sosial şəbəkələrdə Cəsarətlə bağlı paylaşımları, haqqında yazdıqları xoş sözlər, səmimi xatirələr göstərir ki, şəhid tələbəmiz hələ uşaqlıqdan, yeniyetməlik çağlarından insanların ürəklərində özünə yer etməyi bacarıb, özünü sevdirə bilib.
Cəsarət Səfərov 2018-ci ildə Lənkəran Dövlət Universitetinin “Aqrar və mühəndislik” fakültəsinin qiyabi təhsilalma forması üzrə Aqronomluq ixtisasına qəbul olunub. 2019-cu ildə təhsilini donduraraq iyul ayında Gəncəyə, hərbi xidmətə yollanan C. Səfərov 2020-ci ilin 27 sentyabrında İkinci Qarabağ savaşı başlananda aktiv döyüşlərə qatılıb. O, Füzuli, Zəngilan, Qubadlı və Xocavəndin alınması uğrunda gedən döyüşlərdə iştirak edib, cəsurluğu, igidliyi ilə nümunə olub, seçilib. Son dəfə ailəsi noyabrın 3-ündə Cəsarətlə əlaqə saxlaya bilib. Noyabrın 4-ü Laçın istiqamətində gedən döyüşlərdə igid əsgərin qəhrəmanlıqla həlak olduğu, şəhidlik zirvəsinə yüksəldiyi xəbəri gəlib. C.Səfərovun nəşi 45 gün sonra, dekabrın 19-u ailəsinə təhvil verilir və II Fəxri Xiyabanda, böyük insan izdihamının iştirakı ilə torpağa tapşırılır.
Vətən müharibəsi şəhidi Cəsarət Səfərov şəhadətindən sonra “Laçının azad olunmasına görə”, “Zəngilanın azad olunmasına görə”, “Qubadlının azad olunmasına görə” , “İgidliyə görə” və “Vətən uğrunda” medalları ilə təltif olunub. Onun əmisi oğlu Şahmar Səfərov da Vətən müharibəsi şəhididir. Cəsarətlə eyni vaxtda döyüşən Şahmar da 44 günlük Vətən müharibəsində qəhrəmanlıqla döyüşərək şəhadət zirvəsinə yüksəlib, Səfərovların soyadını ölkəmizin şərəf salnaməsinə qanı ilə həkk edib.
Allah rəhmət eləsin!
