Ədəbiyyat İnstitutunun illik hesabatı: 151 iş, 98 kitab, 872 məqalə
AMEA Nizami Gəncəvi adına Ədəbiyyat İnstitutunun Elmi şurasının hesabat iclası keçirilib.
İnstitutdan TƏHSİL.BİZ-ə bildirilib ki, öncə il ərzində nəşr edilmiş kitablardan ibarət sərgi ilə tanışlıq olub.
Elmi şuranı AMEA-nın prezidenti akademik İsa Həbibbəyli açaraq gündəlikdəki məsələlərlə iştirakçıları tanış edib.
Akademik İsa Həbibbəyli Prezident İlham Əliyevin AMEA-nın 80 illik yubileyindəki çıxışı və Ədəbiyyat İnstitutunun vəzifələri, həmçinin Elektron xidmətlər şöbəsinin adının dəyişdirilərək Rəqəmsal ədəbiyyatşünaslıq, süni intellekt və elektron xidmətlər adlandırılması, funksiyaları haqqında fikirlərini bölüşüb.
Sonra Nizami Gəncəvi adına Ədəbiyyat İnstitutunun elmi katibi filologiya üzrə fəlsəfə doktoru, dosent Aygün Bağırlı 2025-ci il üzrə illik elmi hesabatı təqdim edib. Aygün Bağırlı Azərbaycan Respublikası Prezidentinin fərman və sərəncamlarının, Nazirlər Kabinetinin qərarlarının, habelə dövlət proqramlarının icrası ilə əlaqədar elmi müəssisələrə tapşırılmış işlərin yerinə yetirilməsi haqqında məlumat verib. O, Azərbaycanda “Konstitusiya və Suverenlik İli”ndə həyata keçirilən tədbirlər ilə əlaqədar nəşr olunmuş kitablar barəsində iştirakçıları məlumatlandırıb.
“Ümumilikdə il ərzində institutda 2 istiqamət, 8 problem, 19 mövzu üzrə işlənilən 151 işdən 80-i tamamlanıb, 71 iş üzrə tədqiqat davam edir. İnstitutun uğurları sırasında 16 tərtib, 5 tərcümə, 7 dərslik olmaqla 98 kitab, 66-sı xaricdə, 577-si jurnal və toplularda, 229-u qəzetdə olmaqla 872 məqalə çap olunub”, - deyə Aygün Bağırlı bildirib.
Ədəbi tənqid şöbəsinin müdiri filologiya elmləri doktoru Vaqif Yusifli “Ədəbi proses – 2025” yaradıcılıq müşavirəsinə hazırlığın vəziyyəti haqqında məlumat verib.
Yekunda AMEA Məhəmməd Füzuli adına Əlyazmalar İnstitutun direktoru akademik Teymur Kərimli və Azərbaycan Milli Elmlər Akademiyasının Rəyasət Heyəti aparatının Elm və təhsil şöbəsinin müdiri filologiya elmləri doktoru, dosent Sərxan Xavəri Ədəbiyyat İnstitutunun hesabat ilində gördüyü işləri yüksək qiymətləndiriblər.
