ADPU-nun Quba filialında intellektual oyun keçiirilib
Azərbaycan Dövlət Pedaqoji Universitetinin (ADPU) Quba filialında "Heydər Əliyev” kuboku uğrunda "Nə? Harada? Nə zaman?” formatında intellektual oyun keçirilib.
Bu barədə "tehsilmedia.info"a ADPU-dan məlumat verilib.
Bildirilib ki, tədbir Quba rayon Gənclər və İdman İdarəsi, "Yurd” Gənclərin İntellektual İnkişafına Dəstək İctimai Birliyi və ADPU-nun Quba filialı tərəfindən birgə təşkil edilib.
İntellektual oyunda ADPU-nun Quba filialının, Quba Dövlət Sosial-İqtisadi Kollecinin və Quba Tibb Kollecinin tələbələri iştirak ediblər. Yarışa hər təhsil müəssisəsindən 3 komanda, hər komandada isə 5 nəfər olmaqla, ümumilikdə 45 nəfər qatılıb.
Tədbirin açılış mərasimində çıxış edən Quba Rayon Gənclər və İdman İdarəsinin rəisi Mustafa Nöhbalayev, ADPU-nun Quba filialının direktor köməkçisi Mürvət Əliyev, "Yurd” Gənclərin İntellektual İnkişafına Dəstək İctimai Birliyinin sədri Ramin Mahmudov Ulu Öndər Heydər Əliyevin müstəsna tarixi xidmətlərindən danışıb, əsası Ümummilli Lider tərəfindən qoyulmuş dövlət gənclər siyasətinin əhəmiyyətini vurğulayıblar.
Eyni zamanda, intellektual oyunun iştirakçılarına uğurlar arzulanıb.
Sonra intellektual oyunun qaydaları haqqında komandalara məlumat verilib. Oyun hər turda 12 sual olmaqla iki turda keçirilib. Komandaların kubok uğrunda mübarizəsinin yekununda Quba Dövlət Sosial-İqtisadi Kollecinin "Bayraktar” komandası I yeri, ADPU-nun Quba filialının "Aid” komandası II yeri, Quba Tibb Kollecinin "Zəfər” komandası isə III yeri tutub.
Qaliblərə diplomlar, I yeri tutan komandaya isə kubok təqdim olunub.
