Kataliz və Qeyri-Üzvi Kimya İnstitutunda şagirdlər üçün “Açıq qapı” günü keçirilib
Kataliz və Qeyri-Üzvi Kimya İnstitutunda Cəfər Cabbarlı adına 161 nömrəli tam orta məktəbin şagirdləri üçün “Açıq qapı” günü keçirilib.
İnstitutdan bildirilib ki, tədbirin ilk hissəsində kimya üzrə fəlsəfə doktoru Lətifə Həsənova şagirdlərə institutun yaranma tarixi və burada fəaliyyət göstərmiş görkəmli Azərbaycan kimyaçılarının həyat və elmi fəaliyyətləri barədə ətraflı məlumat verib, həmçinin onları akademik Murtuza Nağıyevə həsr olunmuş muzeylə tanış edib.
Sonra şagirdlər institutun müxtəlif laboratoriyalarına ekskursiya edərək burada quraşdırılmış müasir cihaz və avadanlıqlarla yaxından tanış olublar. Kimya üzrə fəlsəfə doktoru Lətifə Həsənova xromatoqrafiya üsulunun tətbiqi, bidistillə suyun alınması qurğusu və axınlı reaktor sistemli qazfazalı oksidləşmə reaksiyalarının keçirildiyi qurğularla şagirdləri tanış edib.
Tədbirin maraqlı anlarından biri Analitik kimya laboratoriyasında yaşanıb. Kimya üzrə fəlsəfə doktoru Gülü Abbasova şagirdlərə əyləncəli və tədrisə uyğun təcrübələr nümayiş etdirib. Vulkan reaksiyası və fenolftalein ilə qələvi analizləri şagirdlərə əyani göstərilibHəmçinin şagirdlərə laboratoriya şəraitində baş verə bilən bəzi çətinliklər barədə məlumat verilib. Məsələn, sınan kolba və ya digər laboratoriya avadanlıqlarının qırılması və bunların təhlükəsiz şəkildə bərpası barədə praktiki izahlar verilib.
“Açıq qapı” günü şagirdlərin kimya sahəsində daha dərin biliklərə yiyələnmələri və elmi kəşflərə olan maraqlarının artması baxımından böyük əhəmiyyət kəsb edir. Bu cür tədbirlər gənc nəsil arasında elmə olan marağın artmasında mühüm rol oynayır.
