İsveçrəli uşaqlara “Fitnə” hekayəsi təqdim olunub - FOTO

İsveçrənin Bazel şəhərində dahi Azərbaycan şairi və mütəfəkkiri Nizami Gəncəvinin "Yeddi gözəl” poemasındakı "Fitnə” hekayəsi əsasında hazırlanmış "Fitnə”  kitabının təqdimatı keçirilib.

tehsilmedia.info xəbər verir ki, "Azərbaycanın Dostları" Birliyinin təşkilatçılığı ilə JUKİBU kitabxanasında baş tutan təqdimat zamanı öncə qonaqlara Azərbaycan ədəbiyyatının qüdrətli söz ustadı Nizami Gəncəvinin yaradıcılığı barədə qısa məlumat verilib. 

Birliyin sədri Arzu Əliyeva Bodmer bildirib ki, 53 dildə oxuculara kitab seçimi imkanı yaradan JUKİBU kitabxanasında ilk dəfə Azərbaycan ədəbiyyatının gözəl nümunəsi olan "Fitnə” hekayəsi alman və Azərbaycan dillərində oxunur. Birliyin adından bu gözəl kitabın ərsəyə gəlməsində böyük əməyi olan, Almaiyada yaşayan Nizami Gəncəvi irsinin tədqiqatçısı Sevil xanım Fuksa dərin minnətdarlığını bildirib və gələcək işlərində ona uğurlar arzulayıb. 

Kitabı alman dilində Fatma Kandaz, Azərbaycan dilində isə Arzu Əliyeva Bodmer oxuyub. Təqdimatdan sonra "Fitnə” hekayəsi mövzusunda müxtəlif oyunlar təşkil edilib və uşaqlara xatirə hədiyyələri təqdim olunub.

Qeyd edək ki, Nizami Gəncəvinin anadan olmasının 880-ci ildönümü münasibətilə nəşr edilmiş "Fitnə” kitabının illüstrasiyaları gənc rəssam İsgəndər Məmmədov, əsərin poetik variantı Raynhard Moritsen tərəfindən hazırlanıb.